ماذا لو كان جيفارا مصرى

جيفارا تلك الشخصيه التى تختلف مع معتقداتها لكنك لا تمتلك إلا أن تحترمها وتقدرها بل وتحبها .... فى ذكرى ميلاده تخيلت ماذا لو كان جيفارا مصرى ليس هذا فحسب بل مصرى مباركى يعنى فى عصر مبارك -يا سلام- والله كانت تبقى حاجه عظيمه أوى بس أنا متأكد أنه ماكنش هيبقى جيفارا اسطوره زى ما هو دلوقت لآن ببساطه مصر مافيهاش غير أسطوره واحده هو بابا حوس حوس مبارك لو كان فعلا مصرى كانت أسطورة مبارك هى اللى هتغطى على أسطورة جيفارا وبعدين كمان إحنا عارفين إن بابا حسنى عنيد وجيفارا برده عنيد يعنى مبوم مع مبروم ما يلفش يعنى جيفارا مش هياكل مع حسنى مثلا هنتخيل إن جيفارا حشد ميت ألف مصرى عشان يعمل بيهم مظاهره ببساطه تلاقى مبارك نزلك الشارع مش بـ200 ألف جندى امن دوله إنما نزل لك بالدبابات والمدافع يبقى بالله عليك مين فيهم الأسطوره؟؟ وبعدين جيفارا كان حساس أوى يعنى عندنا مشكله انه كان بيقول (اننى أحس على وجهى بألم كل صفعه توجه للمظلوم فى هذه الدنيا) تخيلوا بقى هيحس بألم كام مظلوم فى مصر ؟؟ يا أخى كفايه يحس بألم الشرقاوى واللى إتعمل فيه

أصل الحكايه إن إحنا مش عايزين عايزين جيفارا واحد لان واحد جيفارا بس ، هيخلص بإحساسه بآلام المصريين خلال ساعتين إنما إحنا عايزين 70 مليون جيفارا.

يا خبر إسود يا بابا حسنى دا أنت جبار أقنعتنى إن مافيش أمل حتى لو عندنا مليون جيفارا (لازم 70 مليون جيفارا). كويس والله إن جيفارا مش مصرى كان زمانه دلوقتى بيجرى على أكل عايشه أو على الأقل عمال يدور على مكان يتفرج فيه على كاس العالم وكان ممكن تكبر فى دماغه ويثور علشان التشفير ولا حاجه.

جيفارا إنت ضربت مثل للمناضل ، النضال مش من فوق ، النضال فى أقل حاره فى وسط البلد فى مصانع ومزارع بين العمال والناس اللى طلعان عينهم ، جيفارا المثل اللى انت ضربته فى النضال هيفضل لحد ماينتهى الظلم فى العالم يعنى ليوم القيامه لان فى الوقت دا بس مش هيكون فيه أى ظالم.

--------------------------------------------------
حاجه مالهاش علاقه بالموضوع بس مهمه جدا يوم السبت القادم بعض المعتقلين هينزلوا النيابه فى مصر الجديده صباحا يا ريت كلنا نكون موجوديين