الاثنين، أغسطس ٢٨، ٢٠٠٦

صور مظاهرة اليوم-حادثه جديد،الشرطه تلقى بمواطن من الدور الرابع

آسف لطول هذا البوست علشان فيه أحداث كتير الأيام دى وكمان كان فيه مظاهره وفيها مفجأه عن إن الشرطه رمت واحد من الدور الرابع أمام أعين أطفاله عموما دى محتويات البوست

المقالات:
-حادثة قطار قليوب ..... عادى
-مهدى عاكف ... كفايه عليك كده
-بحب السيما ... جدا

التغطيات:
- صور مظاهرة اليوم أمام نقابة الصحفيين
- الشرطه المصريه تقذف بمواطن من الطابق الرابع





حادثة قطارى قليوب .... عادى

مش عارف ليه لما سمعت خبر تصادم القطارين فى قليوب مازعلتش ، أو بمعنى أصح قلت فعقل بالى "عادى" ، أصل حكاية إن يموت كام واحد بسبب إهمال أو خطأ تقنى أو بشرى بقى شيئ عادى فى مصر ، لما سمعت الناس عماله تنتقد الحكومه وعايزه تقيل رئيس الوزراء قلت برده "عادى" ،لان كل مره نطالب بإقالو فلان وفلان وخلاص لاحد بيقلوه ولا هو بيستقال ولا إحنا بنسأل بعدها ، وبعدين أصل الحكايه مش هتيجى على حادثة قطر مات فيها كام ميت واحد ، الحكايه إن إحنا خلاص إتعودنا على البلاوى ، ولا مؤخذه المواطن المصرى بقى رخيص ، وبعدين لما يكون من سنة 2000 الى الآن فيه 59 حادثة قطار ووزارة النقل لم تجدد القطارات ومكاحدش إستقال ولا حد أقيل ولا أى حاجه حصلت ، يبقى عادى جدا لما كام ميت واحد يموتوا فحادثة قطار ، يبقى عادى لما قطر يدخل فى قطر تانى والناس تتفرم ، يبقى عادى لما وزير النقل مايستقلش ، بس العادى فعلا إن رئيس الوزراء لم ولن يقيله ، وبرده عادى لما فى الآخر اللى يتحاسب عامل التحويله او يلقوا اللوم على السائق اللى أساسا مات أو حتى يقيلوا مش عارف رئيس قطاع ايه كده ويبقى هو كبش الفدا .
وبعدين ما من كام سنه قطر فى الصعيد ولع باللى فيه والوزير ماتحكميش ولا أى حاجه وخرج زيه زيه اى وزير من الوزاره بعدها بمده صغيره يبقى اللى حصل فى قليوب شيىء عادى مايستهلش دا كله ،و اذا كان القرصان ممدوح إسماعيل غرق 1000 مواطن ، ومن كام شهر اشتعلت النار فى أحد عبارات شركة السلام مره آخرى ، دا كله وممدوح إسماعيل هربان وعايش عيشه الملوك بره مصره ، يبقى عادى جدا لما الوزير ورئيس الوزراء مايتعقبوش على القطار وعلى اللى ماتوا فيه ، ولما يوسف والى يجيب لنا بذور مسرطنه والناس يجيلهم فشل كلوى وكبد ويجيب لنا خبراء اسرائليين لمزارعنا كل دا وما حدش يقوله إنت بتعمل ايه ، يبقى اللى حصل فى قطار القليوب عادى ، لما يكونوا عايزيين يبيعوا عمر افندى أقل من سعره الأصلى بمليار جنيه يبقى اللى حصل فى قطار قليوب عادى ، لما يخصخصوا شركات بتكسب ولما يشردوا العمال ولما الشعب مايلقيش ياكل ونصفه تحت خط الفقر ، يبقى اللى حصل فى قطار قليوب عادى ، لما القضاء يكشف تزوير إنتخابات مصطفى الفقى لكن يفضل عضو فى البرلمان رغم الادله ، يبقى اللى حصل فى قطار قليوب عادى ، لما الأمن يعتقل 52 فرد من الحركه الوطنيه غير 700 من الإخوان فى ظرف شهر كل دا ومافيش حد يقوله تلت التلاته كام ،يبقى اللى حصل فى قطار قليوب عادى ، لما حسنى مبارك يسجن أيمن نور ويحاكم الإبراشى و إبراهيم عيسى ويسحل قضاه مصريين ، يبقى اللى حصل فى قطار قليوب عادى ، لما حوادث زى بنى مزار و محرم بك وبقية حوادث الإعتداء على كنائس تؤيد ضد مختل عقلى ، يبقى اللى حصل فى قطار قليوب عادى ، لما مصر يكون مركزها 141 من أصل 157 دوله فى التصدير ،يبقى اللى حصل فى قطار قليوب عادى ، لما يكون واحد زى أحمد نظيف رئيس وزراء وواحد زى فتحى سرور رئيس البرلمان وواحد زى الفقى وزير إعلام وواحد زى العدلى وزير داخليه برتبة بلطجى ومجلس شعب فيه واحد زى أحمد عز ولجنة سياسات للحزب الحاكم فيها واحد زى احمد عز برده ، لما يكون الرئيس - مبارك - بقاله 30 سنه مش عارف يسد ديون مصر، لما يكون جمال مبارك هو الرئيس القادم ، يبقى اللى حصل فى قطار قليوب عادى ، إنتوا ليه بتعرضوا على الحوادث دى ، مع إن دى هتفيدنا فى تحديد النسل وهتقضى على مشكلة البطاله ومشكلة السكان وهتقلل من عدد الفقراء فى مصر ، يبقى لما الحوادث البسيطه دى تساعد فى حل المشاكل دى كلها يبقى إحنا نعترض ؟؟ فعلا مايملاش عين إبن آدم إلا التراب .
معلش يا ريس ومعلش يا سيادة رئيس الوزراء ومعلش ياوزير النقل ، العيب مش فيكوا العيب فى الشعب مش عارف مصلحته فين ، الناس زهقوا من النعم اللى إنت بتمن عليهم بيها يا ريس وبييجوا فى الهايفه ويتصدروا علشان الحريه والمستوى اللى هما عايشيين فيه ومش حاسين، الله يخليك كفايه علينا كده يا ريس أصل إحنا عالم ما تستهلش دا كله
يا رب ماتبسطهاش أكتر من كده.

---------------------------------------------

مهدى عاكف ... كفايه عليك كده


المرشد العام للإخوان المسلمين أدلى بتصريح فى نقابة الصحافيين بيقول فيه :
قال مهدي عاكف «المرشد العام للإخوان المسلمين»: إن القضية الفلسطينية وتحرير الأرص ستظل قضيتنا الأولي لأنها السبيل الوحيد للتخلص من شر الإسرائيليين والأمريكيين في المنطقة، مستنكراً موقف الحكام العرب الصامت تجاه الانتهاكات الإسرائيلية علي أرض فلسطين. ووصف عاكف موقف بعض القادة العرب تجاه الحرب علي لبنان «بالمخزي» و«المهين»، قائلاً: «لولا إنهم موحدون بالله لقتلناهم» لأن خطرهم أشد وطأة من خطر اليهود أنفسهم، مشيراً إلي أن دعوة رئيس وزراء إسرائيل لقيام الدول العربية بإعادة إعمار لبنان قبل أن تقوم إيران بذلك يعد أمراً «مقززاً». وتساءل عاكف: كيف تدعو أمريكا والدول الأوروبية لإعادة إعمار العراق وأفغانستان وفلسطين ولبنان بعد أن قامت بتدميرها، مؤكداً أن أقل ما يقال عن هذا الأمر إنه «إجرام وحقارة وفساد» ويحمل استخفافاً من جانب الغرب تجاه الدول العربية وقياداتها. وقال عزيز صدقي «رئيس الوزراء الأسبق» إن حزب الله أعاد المجد العربي، بعد أن استطاع رجاله أن يصلوا ولأول مرة إلي العمق الإسرائيلي، مشيراً إلي أن نصر الله أعطي درساً قوياً لإسرائيل في الوقت الذي تقاعس فيه القادة العرب عن مواجهتها لسنوات طويلة بزعم أنها لا تقهر. المصرى اليوم

أنا مش عارف إيه حكاية الأخ ده ، بعد تصريحات الجزم دلوقتى عايز يقتل الحكام العرب لولا انهم موحدين بالله ، وبعدين يا عم تقتل مين وأساسا مافيش أخ فمصر بيطلع مظاهرات ضد المؤسسه الرئيسيه؟
هى القضيه فلسطين ولبنان وبس؟؟؟ بص شويه لجوه وإنت تعرف إن فيه مشاكل داخليه ممكن تساعد فيها الأولويه للمشاكل الداخليه يا فضيلة المرشد أنا ماقصدش إننا نهمل القضيه الفلسطينيه أو الليبنانيه إنما مش يكون هدفنا كله حل القضيتين وسيبين أو مهملين المشاكل الداخليه بالطريقه دى.
يا فضيلة المرشد نصيحه لوجه الله ماتقولش تصريحات تانى ، يا إخوان شوفوا واحد يتكلم بدل المرشد ، محمد حبيب أو دكتور عبدالمنعم أبو الفتوح او الدكتور عصام العريان لما يفرجو عنه - إن شاء الله - الناس دى بتعرف تتكلم كويس وممكن تعدل شوية من اللى سيادتك عملته من أول تصريحات الجزم مرور بالعشرة آلف مقاتل للتصريح الآخير بتاع قتل الحكام العرب .
أنا ما اقصدش أنى أهاجم الإخوان لانى بحترم وبحب شخصيات كتير جدا منهم



------------------------------------------------

بحب السيما .... جدا

فيلم بحب السيما من أفضل الأفلام اللى شوفتها على الإطلاق ، أنا عارف إن الفيلم قديم والكلام عنه دلوقتى مالوش لازمه وممل ، أنما المره دى مش هتكلم عن إن الفيلم بيسيىء للدين المسيحى أو أى حاجه من الحاجات اللى إتقالت قبل كده ، إنما أنا عايز أتكلم عن 3 مشاهد فى الفيلم عجبونى جدا جدا ، وكل مره أتفرج على الفيلم لازم أقعد أستنى المشاهد دى .
المشهد الأول مشهد محمود حميده لما نزل يبحث على تاكسى ليلا علشان يجيب دكتور لإبنه - الطفل نعيم - المريض ، المشهد أكثر من رائع ومحمود حميده أبدع فى اللقطه وهو بيوقف التاكسى ، حركاته ملامح وتعبيرات وجهه نبرة صوته كل حاجه فى المشهد دا رائعه فعلا.
المشهد التانى لما الطفل نعيم يوقف فى البلكونه ويكلم الرب ويعاتبه على أنه سيدخله جهنم ويقول أنه يكرهه او ماشابه ذلك ، والمشهد دا بيكون الجو ممطر والسماء بها برق ورعد ، بجد المشهد رائع فعلا دا غير إنه أساسا بيتعرض لقضية التطرف والتزمت الدينى لان الطفل أساسا قال الكلام دا لان أبوه - اللى هو محمود حميده - كان بيخوفه بجهنم وإن ربنا مش هيسيبه ومش هيدخله الفردوس إلا لو عمل كذا وكذا ، بالظبط زى ما كل أهلينا بيعملوا فينا - سواء مسلمين أو مسيحيين - بيخلونا نخاف من ربنا أكتر مانحبه ، لما نعبد ربنا لاننا بنحبه - وبنخاف عذابه طبعا - أحسن وأعلى قدر بكتير من إننا نعبد ربنا علشان بنخافه بس.
المشهد الثالث هو آخر مشهد فى الفيلم لما يكون جد الطفل نعيم جالس هو وأفراد العائله بما فيهم نعيم وفجأه وهم يشاهدون التليفزيون يموت الجد ، نعيم يرى أن جده مات لكنه ببساطه يذهب إلى التليفزيون ويرفع الصوت ويجلس مباشره أمام التليفزيون ويظهر فى خلفيته أمه وجدته وخالته وخاله يصرخون من أجل جد نعيم ، كمان نعيم وهو بيتفرج على التليفزيون مش بيضحك بطريقه غريبه عن ضحكته فى بقية الفيلم .
بجد الفيلم أكثر من رائع ، مش عارف ليه الناس كانت معترضه على الفيلم ، أنا مش شايف إنه بيعادى الدين المسيحى أو فيه حاجه بتسيىء للإسلام ، كل الموضوع إن الفيلم بيلقى الضوء على مشكلة التزمت الدينى المسيحى و الفهم الخاطىء للدين
------------------------------------------------------
تغطية مظاهرة اليوم أمام نقابة الصحفيين

من المفترض إن مظاهرة اليوم كانت لحادثة القطارين والغلاء كما جاء على موقع الحركه المصريه من أجل التغيير كفايه لكن ماحدث أن هتافات لبنان طغت أكثر على المظاهره ومفاجأه آخرى هى حضو أسرة مواطن ألقاه رجل شرطه من الدور الرابع فى آخر هذه الصفحه تفاصيل أكثر عن هذه الحادثه

بدأت المظاهره الساعه السابعه تقريبا أما نقابة الصحفيين ونتهت الساعه الثامنه ثم تبعها مؤتمر إحتفالا بنصر المقاومه الليبنانيه
اترككم مع الصور






خدوا بالكوا كويس أوى من اللافته والشاب


خد بالك من دى برده





أفضل صوره



**********

بدأ بعد ذلك مؤتمر للإحتفال بنصر المقاومه الليبنانيه




-----------------------------------

الشرطه المصريه تقذف بمواطن من الطابق الرابع

فى وسط المظاهره تكلم شاب عن حادثة أخوه الذى ألقاه شهاب الشاعر إبن شقيق اسماعيل
الشاعر

عموما هذه أوراق بخط مهمه تحكى الحادثه بالتفصيل




صورة القتيل - شرين غريب





إضغط على الصوره للتكبير





إضغط على الصوره للتكبير




إضغط على الصورة للتكبير



إضغط على الصوره للتكبير





صوره من شهادة الوفاه - إضغط على الصوره
للتكبير

الثلاثاء، أغسطس ٢٢، ٢٠٠٦

عدد خاص لتغطية إعتصام ليله من اجل الحريه


الداعى للإعتصام حركة مدونين من أجل الحريه
بدأ الإعتصام الساعه التاسعه الا ربع تقريبا بعد ان تحركنا إتجاه ميدان طلعت حرب بدأت بمسيرة الى أن وصلت الى ميدان طلعت حرب و قامت بلف الميدان ثم أخذت موقعها حتى الصباح أحداث كثيرة و مفاجئه - بكاء بعض عساكر الامن من الالم اثناء وقوفهم تلك الفترة الطويلة و انهيار اربعة منهم تماما - حضور جميلة اسماعيل للاعتصام و ادلائها بتصريحين صحفيين - سماع أحدهم للاسلكى الامن أوامر بالقبض على أسماء بعينها من المشتركين فى الاعتصام - اعلان البيان لحركة مدونون من أجل الحرية
أغانى و اشعار تسمع لاول مرة تم تأليفها خصيصا من أجل الاعتصام ظهور كمال خليل المفاجىء تضامنا مع الاعتصام القبض على أثنيين ثم الافراج السريع عنهم.
قام بتنظيم هذا الإعتصام :

1- مصر الحره -كريم الشاعر
2- ميت -محمد عادل
3-تخاريفى - جيمى هوود
4- مواطن مصرى واخد على قفاه
5-أسد
6-كلام حر - محمد السعيد
ومن غير المدونين :أحمد صلاح - شباب من أجل التغيير


وهذه بعض الصور التى تم إلتقطها وشكرا لمساعدة أسد وجيمى هوود


أثناء إتجاهنا إلى مبدان طلعت حرب

انتهت المسيره بعد الدوران عدة مرات حول تمثال طلعت حرب ثم استقرار الإعتصام على جانب الميدان


جيمى هوود غنى للحريه



مين فيهم ال

الحريه لمصر










جميله إسمايعل حضرت لمدة طويله












على الفيل لم شباب كتير جدا ماشيين فى الشارع وقعد يجيب لهم لوحات ويشرح لهم البلاوى اللى احنا فيها لدرجة ان فيه بنتين كملوا الإعتصام معانا لتانى يوم الصبح



على الفيل لسه بيكلم الشباب













المفاجئه هى حضور المهندس كمال خليل




-------------------------------------
الساعه 12 تقريبا ألقى أسد بيان مدونون من أجل الحري وهذا هو البيان :
بيان مدونون من أجل الحريه
فى ظل مأساوية الوضع الحالى فى بلادنا من إنتهاك لحقوق الإنسان وحريته فى التعبير عن رأيه أطلق عدد من المدونين المصريين صرخه فى وجه الطغيان دفاعا عن حرية الرأى والتعبير وإيمانا منا بدور التدوين المؤثر فى الدفاع عن قضايا الحريات نظمنا اليوم هذا الإعتصام تضامنا مع سجين الحريه الدكتور أيمن نور وآلاف المعتقلين السياسيين فى سجون الطاغيه مبارك ، ونؤكد أننا سوف نواصل أداء واجبنا ضد الاستبداد وضد النظام المباركى ، وسنستمر فى ذلك حتى النصور ونحن مستعدون لدفع الثمن وتحمل تبعات الوقوف فى وجه الطغيان
يسقط يسقط حسنى مبارك
الحريه للمعتقلين السياسيين
الحريه لمصر
شكر خاص للزميل وائل عباس جريدة الوعى المصرى الإلكترونيه
حركة مدونون من أجل الحريه

-------------------------------------------
الزميل بلال دياب قام بإلقاء هتاف للمدونين هذا بعض منه:
حرية رأيى ................مدونين
لا للتلفيق ....................مدونين
لا للتعذيب .................مدونين
والإعتقالات ...............مدونين
تلاقينا ع النت .................مدونين
وفى الشاورع ..............مدونين
بنقولها قويه ...............مدونين
هما النضال .............مدونين

-------------------------------------------
الإعتصام نظمه حركة مدونون من أجل الحريه وحضر من المدونين :

1- مصر الحره -كريم الشاعر
2- ميت -محمد عادل
3-تخاريفى - جيمى هوود
4- مواطن مصرى واخد على قفاه
5-أسد
6-كلام حر - محمد السعيد
7- فساكونيا - مصطفى ماهر
----------------------------------------
لمشاهدة صور الإعداد للإعتصام إضغط هنا




----------------------------------------
صور مظاهرة السبت أمام نقابة المحاميين إضغط هنا