الاثنين، أغسطس 28، 2006

صور مظاهرة اليوم-حادثه جديد،الشرطه تلقى بمواطن من الدور الرابع

آسف لطول هذا البوست علشان فيه أحداث كتير الأيام دى وكمان كان فيه مظاهره وفيها مفجأه عن إن الشرطه رمت واحد من الدور الرابع أمام أعين أطفاله عموما دى محتويات البوست

المقالات:
-حادثة قطار قليوب ..... عادى
-مهدى عاكف ... كفايه عليك كده
-بحب السيما ... جدا

التغطيات:
- صور مظاهرة اليوم أمام نقابة الصحفيين
- الشرطه المصريه تقذف بمواطن من الطابق الرابع





حادثة قطارى قليوب .... عادى

مش عارف ليه لما سمعت خبر تصادم القطارين فى قليوب مازعلتش ، أو بمعنى أصح قلت فعقل بالى "عادى" ، أصل حكاية إن يموت كام واحد بسبب إهمال أو خطأ تقنى أو بشرى بقى شيئ عادى فى مصر ، لما سمعت الناس عماله تنتقد الحكومه وعايزه تقيل رئيس الوزراء قلت برده "عادى" ،لان كل مره نطالب بإقالو فلان وفلان وخلاص لاحد بيقلوه ولا هو بيستقال ولا إحنا بنسأل بعدها ، وبعدين أصل الحكايه مش هتيجى على حادثة قطر مات فيها كام ميت واحد ، الحكايه إن إحنا خلاص إتعودنا على البلاوى ، ولا مؤخذه المواطن المصرى بقى رخيص ، وبعدين لما يكون من سنة 2000 الى الآن فيه 59 حادثة قطار ووزارة النقل لم تجدد القطارات ومكاحدش إستقال ولا حد أقيل ولا أى حاجه حصلت ، يبقى عادى جدا لما كام ميت واحد يموتوا فحادثة قطار ، يبقى عادى لما قطر يدخل فى قطر تانى والناس تتفرم ، يبقى عادى لما وزير النقل مايستقلش ، بس العادى فعلا إن رئيس الوزراء لم ولن يقيله ، وبرده عادى لما فى الآخر اللى يتحاسب عامل التحويله او يلقوا اللوم على السائق اللى أساسا مات أو حتى يقيلوا مش عارف رئيس قطاع ايه كده ويبقى هو كبش الفدا .
وبعدين ما من كام سنه قطر فى الصعيد ولع باللى فيه والوزير ماتحكميش ولا أى حاجه وخرج زيه زيه اى وزير من الوزاره بعدها بمده صغيره يبقى اللى حصل فى قليوب شيىء عادى مايستهلش دا كله ،و اذا كان القرصان ممدوح إسماعيل غرق 1000 مواطن ، ومن كام شهر اشتعلت النار فى أحد عبارات شركة السلام مره آخرى ، دا كله وممدوح إسماعيل هربان وعايش عيشه الملوك بره مصره ، يبقى عادى جدا لما الوزير ورئيس الوزراء مايتعقبوش على القطار وعلى اللى ماتوا فيه ، ولما يوسف والى يجيب لنا بذور مسرطنه والناس يجيلهم فشل كلوى وكبد ويجيب لنا خبراء اسرائليين لمزارعنا كل دا وما حدش يقوله إنت بتعمل ايه ، يبقى اللى حصل فى قطار القليوب عادى ، لما يكونوا عايزيين يبيعوا عمر افندى أقل من سعره الأصلى بمليار جنيه يبقى اللى حصل فى قطار قليوب عادى ، لما يخصخصوا شركات بتكسب ولما يشردوا العمال ولما الشعب مايلقيش ياكل ونصفه تحت خط الفقر ، يبقى اللى حصل فى قطار قليوب عادى ، لما القضاء يكشف تزوير إنتخابات مصطفى الفقى لكن يفضل عضو فى البرلمان رغم الادله ، يبقى اللى حصل فى قطار قليوب عادى ، لما الأمن يعتقل 52 فرد من الحركه الوطنيه غير 700 من الإخوان فى ظرف شهر كل دا ومافيش حد يقوله تلت التلاته كام ،يبقى اللى حصل فى قطار قليوب عادى ، لما حسنى مبارك يسجن أيمن نور ويحاكم الإبراشى و إبراهيم عيسى ويسحل قضاه مصريين ، يبقى اللى حصل فى قطار قليوب عادى ، لما حوادث زى بنى مزار و محرم بك وبقية حوادث الإعتداء على كنائس تؤيد ضد مختل عقلى ، يبقى اللى حصل فى قطار قليوب عادى ، لما مصر يكون مركزها 141 من أصل 157 دوله فى التصدير ،يبقى اللى حصل فى قطار قليوب عادى ، لما يكون واحد زى أحمد نظيف رئيس وزراء وواحد زى فتحى سرور رئيس البرلمان وواحد زى الفقى وزير إعلام وواحد زى العدلى وزير داخليه برتبة بلطجى ومجلس شعب فيه واحد زى أحمد عز ولجنة سياسات للحزب الحاكم فيها واحد زى احمد عز برده ، لما يكون الرئيس - مبارك - بقاله 30 سنه مش عارف يسد ديون مصر، لما يكون جمال مبارك هو الرئيس القادم ، يبقى اللى حصل فى قطار قليوب عادى ، إنتوا ليه بتعرضوا على الحوادث دى ، مع إن دى هتفيدنا فى تحديد النسل وهتقضى على مشكلة البطاله ومشكلة السكان وهتقلل من عدد الفقراء فى مصر ، يبقى لما الحوادث البسيطه دى تساعد فى حل المشاكل دى كلها يبقى إحنا نعترض ؟؟ فعلا مايملاش عين إبن آدم إلا التراب .
معلش يا ريس ومعلش يا سيادة رئيس الوزراء ومعلش ياوزير النقل ، العيب مش فيكوا العيب فى الشعب مش عارف مصلحته فين ، الناس زهقوا من النعم اللى إنت بتمن عليهم بيها يا ريس وبييجوا فى الهايفه ويتصدروا علشان الحريه والمستوى اللى هما عايشيين فيه ومش حاسين، الله يخليك كفايه علينا كده يا ريس أصل إحنا عالم ما تستهلش دا كله
يا رب ماتبسطهاش أكتر من كده.

---------------------------------------------

مهدى عاكف ... كفايه عليك كده


المرشد العام للإخوان المسلمين أدلى بتصريح فى نقابة الصحافيين بيقول فيه :
قال مهدي عاكف «المرشد العام للإخوان المسلمين»: إن القضية الفلسطينية وتحرير الأرص ستظل قضيتنا الأولي لأنها السبيل الوحيد للتخلص من شر الإسرائيليين والأمريكيين في المنطقة، مستنكراً موقف الحكام العرب الصامت تجاه الانتهاكات الإسرائيلية علي أرض فلسطين. ووصف عاكف موقف بعض القادة العرب تجاه الحرب علي لبنان «بالمخزي» و«المهين»، قائلاً: «لولا إنهم موحدون بالله لقتلناهم» لأن خطرهم أشد وطأة من خطر اليهود أنفسهم، مشيراً إلي أن دعوة رئيس وزراء إسرائيل لقيام الدول العربية بإعادة إعمار لبنان قبل أن تقوم إيران بذلك يعد أمراً «مقززاً». وتساءل عاكف: كيف تدعو أمريكا والدول الأوروبية لإعادة إعمار العراق وأفغانستان وفلسطين ولبنان بعد أن قامت بتدميرها، مؤكداً أن أقل ما يقال عن هذا الأمر إنه «إجرام وحقارة وفساد» ويحمل استخفافاً من جانب الغرب تجاه الدول العربية وقياداتها. وقال عزيز صدقي «رئيس الوزراء الأسبق» إن حزب الله أعاد المجد العربي، بعد أن استطاع رجاله أن يصلوا ولأول مرة إلي العمق الإسرائيلي، مشيراً إلي أن نصر الله أعطي درساً قوياً لإسرائيل في الوقت الذي تقاعس فيه القادة العرب عن مواجهتها لسنوات طويلة بزعم أنها لا تقهر. المصرى اليوم

أنا مش عارف إيه حكاية الأخ ده ، بعد تصريحات الجزم دلوقتى عايز يقتل الحكام العرب لولا انهم موحدين بالله ، وبعدين يا عم تقتل مين وأساسا مافيش أخ فمصر بيطلع مظاهرات ضد المؤسسه الرئيسيه؟
هى القضيه فلسطين ولبنان وبس؟؟؟ بص شويه لجوه وإنت تعرف إن فيه مشاكل داخليه ممكن تساعد فيها الأولويه للمشاكل الداخليه يا فضيلة المرشد أنا ماقصدش إننا نهمل القضيه الفلسطينيه أو الليبنانيه إنما مش يكون هدفنا كله حل القضيتين وسيبين أو مهملين المشاكل الداخليه بالطريقه دى.
يا فضيلة المرشد نصيحه لوجه الله ماتقولش تصريحات تانى ، يا إخوان شوفوا واحد يتكلم بدل المرشد ، محمد حبيب أو دكتور عبدالمنعم أبو الفتوح او الدكتور عصام العريان لما يفرجو عنه - إن شاء الله - الناس دى بتعرف تتكلم كويس وممكن تعدل شوية من اللى سيادتك عملته من أول تصريحات الجزم مرور بالعشرة آلف مقاتل للتصريح الآخير بتاع قتل الحكام العرب .
أنا ما اقصدش أنى أهاجم الإخوان لانى بحترم وبحب شخصيات كتير جدا منهم



------------------------------------------------

بحب السيما .... جدا

فيلم بحب السيما من أفضل الأفلام اللى شوفتها على الإطلاق ، أنا عارف إن الفيلم قديم والكلام عنه دلوقتى مالوش لازمه وممل ، أنما المره دى مش هتكلم عن إن الفيلم بيسيىء للدين المسيحى أو أى حاجه من الحاجات اللى إتقالت قبل كده ، إنما أنا عايز أتكلم عن 3 مشاهد فى الفيلم عجبونى جدا جدا ، وكل مره أتفرج على الفيلم لازم أقعد أستنى المشاهد دى .
المشهد الأول مشهد محمود حميده لما نزل يبحث على تاكسى ليلا علشان يجيب دكتور لإبنه - الطفل نعيم - المريض ، المشهد أكثر من رائع ومحمود حميده أبدع فى اللقطه وهو بيوقف التاكسى ، حركاته ملامح وتعبيرات وجهه نبرة صوته كل حاجه فى المشهد دا رائعه فعلا.
المشهد التانى لما الطفل نعيم يوقف فى البلكونه ويكلم الرب ويعاتبه على أنه سيدخله جهنم ويقول أنه يكرهه او ماشابه ذلك ، والمشهد دا بيكون الجو ممطر والسماء بها برق ورعد ، بجد المشهد رائع فعلا دا غير إنه أساسا بيتعرض لقضية التطرف والتزمت الدينى لان الطفل أساسا قال الكلام دا لان أبوه - اللى هو محمود حميده - كان بيخوفه بجهنم وإن ربنا مش هيسيبه ومش هيدخله الفردوس إلا لو عمل كذا وكذا ، بالظبط زى ما كل أهلينا بيعملوا فينا - سواء مسلمين أو مسيحيين - بيخلونا نخاف من ربنا أكتر مانحبه ، لما نعبد ربنا لاننا بنحبه - وبنخاف عذابه طبعا - أحسن وأعلى قدر بكتير من إننا نعبد ربنا علشان بنخافه بس.
المشهد الثالث هو آخر مشهد فى الفيلم لما يكون جد الطفل نعيم جالس هو وأفراد العائله بما فيهم نعيم وفجأه وهم يشاهدون التليفزيون يموت الجد ، نعيم يرى أن جده مات لكنه ببساطه يذهب إلى التليفزيون ويرفع الصوت ويجلس مباشره أمام التليفزيون ويظهر فى خلفيته أمه وجدته وخالته وخاله يصرخون من أجل جد نعيم ، كمان نعيم وهو بيتفرج على التليفزيون مش بيضحك بطريقه غريبه عن ضحكته فى بقية الفيلم .
بجد الفيلم أكثر من رائع ، مش عارف ليه الناس كانت معترضه على الفيلم ، أنا مش شايف إنه بيعادى الدين المسيحى أو فيه حاجه بتسيىء للإسلام ، كل الموضوع إن الفيلم بيلقى الضوء على مشكلة التزمت الدينى المسيحى و الفهم الخاطىء للدين
------------------------------------------------------
تغطية مظاهرة اليوم أمام نقابة الصحفيين

من المفترض إن مظاهرة اليوم كانت لحادثة القطارين والغلاء كما جاء على موقع الحركه المصريه من أجل التغيير كفايه لكن ماحدث أن هتافات لبنان طغت أكثر على المظاهره ومفاجأه آخرى هى حضو أسرة مواطن ألقاه رجل شرطه من الدور الرابع فى آخر هذه الصفحه تفاصيل أكثر عن هذه الحادثه

بدأت المظاهره الساعه السابعه تقريبا أما نقابة الصحفيين ونتهت الساعه الثامنه ثم تبعها مؤتمر إحتفالا بنصر المقاومه الليبنانيه
اترككم مع الصور






خدوا بالكوا كويس أوى من اللافته والشاب


خد بالك من دى برده





أفضل صوره



**********

بدأ بعد ذلك مؤتمر للإحتفال بنصر المقاومه الليبنانيه




-----------------------------------

الشرطه المصريه تقذف بمواطن من الطابق الرابع

فى وسط المظاهره تكلم شاب عن حادثة أخوه الذى ألقاه شهاب الشاعر إبن شقيق اسماعيل
الشاعر

عموما هذه أوراق بخط مهمه تحكى الحادثه بالتفصيل




صورة القتيل - شرين غريب





إضغط على الصوره للتكبير





إضغط على الصوره للتكبير




إضغط على الصورة للتكبير



إضغط على الصوره للتكبير





صوره من شهادة الوفاه - إضغط على الصوره
للتكبير

هناك 27 تعليقًا:

غير معرف يقول...

tamatem
في الاول عايزة اشكرك علي المدونة الحلوة اوي دي لاني اول مرة بزورها وبجد ال3 مقالات عجبوني اوي وعموما اكيد بعد اللغمة والليل لازم لازم هيكون في فجر انا مش عارثة اقول ايه من كتر الاحزان والكوارث وقلة الحيلة بس انا املي في بكرة وفي الله كبير

shady يقول...

يا نهار اسود سكان المعادى بيحصل لهم كده
امال سكان ام عجورة حيحصل لهم ايه

ربنا يحميك

pepa يقول...

السلام عليكم
برافو ع المجهود الحلو ده

بص يا مواطن.. احنا اخدنا الموضوع بتاع الراجل اللى اترمى م الشباك-الله يرحمه- ونشرناه عندنا

وعايزينك لو لسه على اتصال باخوه تخليه يبعت لنا عشان نرشده لمكتب او جمعية مساعدة قانونية ياخد من خلالها حق اخوه
editor@tortureinegypt.net


سلام عليكم

kalam 7or يقول...

الله يرحم امواتنا جميعا ويرحم الشهيد اللهم امين والهم اهله السلوان يارب
حسبنا الله ونعم الوكيل بجد والله الواحد اتاثر اوى كنت عاوز اقولك برافو يا محمد على الانفراد ده بس للاسف ما تنفعش .
الرحمه يا رب

محمد الطاهر يقول...

tamatem
شكرا جدا

شادى
ربنا يستر علينا

pepa
للأسف أنا مش لاقى رقم أخوه ومش عارف راح فين بس إن شاء الله احاول اجيبه ليك تانى لانه كان مع حد فى شباب من اجل التغيير


كلام حر
حسبنا الله وننعم الوكيل

huda يقول...

طيب كمل بقي ، قلت لنا انه اتقتل ومراته اغتصبت وولاده شاهدوا الكلام ده، الشقة اتهدت علي دماغ اصحابها ، كمل بقي قلنا ليه ، عمل ايه مدرب السباحة علشان يتعمل فيه كدة ، وفين الجران ولا الناس دلوقت بتقت بتسمع الصوت وتستخبى ، كمل عايزين نعرف الحقيقة ايه اللي خلى الظابط يعمل كدة ، ايه اللي كان شرين يعرفه استحق عليه انه يلقى من الدور الرابع بعد ما يتعرض لضرب وتتعرض عيلته كلها لتعذيب ولا سجن ابو غريب ، كمل عايزين نعرف

غير معرف يقول...

جميل يا طاهر انت فنان رواعه الي المام
خالد كامل
كان مدونا
هنا القاهر

ميت يقول...

يسقط يسقط محمد طاهر
يا حريه فينك فينك محمد طاهر بينا وبينك
ضحكوا علينا وقالوا حريه وجابوا لينا محمد طاهر في الفجريه

يابني انا عايز أفهم حاجه بسيطه
هوه إنتي عايزنها إيه بالظبط
تطلعوا وتقولوا عايزينها ثوره سلميه نشتغل معاكم عايزينها ثوره مسلحه ، نقول ماشي ولكن تيجوا إنتوا بقي تلطعوا عيال وتسيبونا وتمشوا

ثم مين إلي قال لسيادتك إن مافيش شباب من الإخوان بيحضروا مظاهرات ، ياجدع ما انا أهوه ، وبعدين فيه ناس تانيه منالغخوان بتحضر بس ماحدش عارفها

سلام يا إكس

alzaher يقول...

اتفقت مع مجموعة مع الزملاء المهتمين بالتراث على مشروع جديد يتلخص في "احياء فكرة النهضة"وبتفصيل أكثر احياء فكر كل من :السيد جمال الدين الأفغاني والامام محمد عبده وعبد الرحمن الكواكبي وعبد الله النديم فنحن أحوج ما نكون الى هذا الفكر المقاوم للاستبداد في هذه اللحظة بالذات من تاريخنا والى هذا الخطاب الديني المتسامح في مواجهة خطاب الطائفية والفرقة المنتشر حاليا ويقوم المشروع على:1.جمع أعمال المفكرين المشار اليهم وتحقيقها
2.انشاء مدونة لنشر هذه الأعمال تباعا
3.اعداد دراسات عن كيفية تجديد هذا الفكر وتحقيق الاستفادة القصوى منه في الوقت الراهن
هذا المشروع ليس مشروعا فرديا لذلك فهو بحاجة الى كافة الجهود الممكنة والدعوة مفتوحة لكل من هو مهتم ويملك القدرة ومستعد لبذل الجهد ،ويمكنكم التواصل معنا عبر هذه المدونة

محمد الطاهر يقول...

هدى
السبب بلاغ كاذب وملفق من ضابط بينه وبين شيرين خصومة
بأن شيرين يحوز مخدرات

---------------------
خالد
انت بتهزر يا ابنى ولا ايه؟؟
فين مدونتك؟؟
ابقى كلمنى الله يهديك
---------------------
ميت
هههههههههههههههههههههههه
هههههههههههههههههههههههههههههه
هههههههههههههههههههههههههههههههههه

بص يا سيدى مبدأيا كلنا عيزينها ثورة سلميه غير مسلحه
احنا بقى بنسيب مين؟؟
واحنا مين أصلا اللى انت تقصدهم؟؟؟
الإخوان مابيطلعوش أى مظاهره مع الحركه الوطنيه وانا ماقابلتش حد غيرك فى من الإخوان وبيطلع معانا مظاهره دا غير ان حتى ساعات بيقولوا هيطلعوا وبعدين يبيعونا واعتقد انها حصلت أكتر من مره
وبعدين كلامك نفسه يدل إن الإخوان فعلا مش بيشتركوا مع الحركه الوطنيه بدليل انك بتقول إن فيه كتير بيحضروا وأنا مش عارفهم معنى كده انهم بيحضروا بصفه شخصيه
امال فين الآلفات اللى بييجوا لما يكون فيه حاجه الإخوان منظماها؟؟

حلوه سلام يا إكس دى
آه بالحق وحياة المرشد العام لتخلص الموقع لانى زهقت
-------------------

huda يقول...

بلاغ كيد ولا بلاغ ملفق الحكاية مش بلاغ يامصري الحكاية كلها ان اكيد الراجل ده يعرف حاجة ، في حاجة ثانية مش قصة بلاغ ومخدرات ، مخدرات ايه ، المخدرات اساسا الناس بتجيبها من الاحراز بتاعة النيابة وبتتباع بعد كدة ، يعني الحكاية حاجة ثانية في حقيقة غايبه ، تفتكر هنفضل نهون علي بعض كدة لحد امتى ، لحد ما نبقي زي العراق نتلم من الشوارع زي القطيع بالعشرين ثلاثين واحد ويتعذبوا وبعدين يترموا في الشارع محروقين وعليه اثار التعذيب ، اخره التطرف والعنصرية دي ايه ، طيب العراق فيها اكراد وشيعة وسنة وكل من الطوائف دي عدى عليها زمن من التعذيب والاضطهاد ، تفتكر احنا كمان ممكن نوصل لنفس المرحلة فجأة كدة نلاقي نفسنا بندبح في نفسنا ، بشائر النهاية دي موجودة فعلا في اقسام الشرطة وزرع خلافات طائفية في مصر دينية كانت او حزبية او حتى حركات سياسية مع بعضها ، تفتكر ممكن نصحى يوم نلاقي الشوارع مليانه جثث غير متعرف عليها من اثر التعذيب اللي عليها ،

غير معرف يقول...

عاوز ابقى مدون ارجوك انا عملت المستحيل علشان اوصل لاى احد فيكم انا لا اريد ان افقد الثقه فيكم لانكم على قناة الجزيره قلتم انكم تريدوا الن تخرجوا بالشباب المصرى من اللى هو فيه ارجوكم اريد ان اكون مدون وان عندى صور التقطها من واقع الشارع المصرى لانى فى النهايه بحب مصر

احمد الباز يقول...

انا عاوز ابقى مدون

احمد الباز يقول...

طبعا الشرطه ملتقدرش تقول حاجه ولكن ياواطنين ربنا معاكم وجايز يكون بيحصلكم كده علشان تتحكوا وتقولوا
لا

محمد الطاهر يقول...

هدى
والله مش عارف بس مافيش اى حاجه بعيده

Anonymous
أحمد الباز
حضرتك ضيف إميلى على ماسنجر الياهوو والإم إس إن وانا أكلمك
mohmmed_eltaher@hotmail.com
mohmmed_eltaher@yahoo.com
ويا ريت تضيفوا الياهوو لان الام اس عندى بايز الأيام دى

غير معرف يقول...

حسبي الله ونعم الوكيل
مافيش كلام ثاني يتقال
اخوكم هاشم الاسواني

the caller يقول...

الس لام عليكم..
محمد..
بوست اكتر من رائع و تغطيه ما كنتش اتوقعها..
حلجى تانى نتكلم عنها بس دلوقتى بقولك انى رجعت كدونتى تانى
اظبط اللينك:)

محمد الطاهر يقول...

Anonymous
فعلا خلص الكلام


the callerد
انتى رحتى فين من زمان ؟؟
دا انا كنت هكتب بوست عندى هنا علشان أقولك تراسلينى بعد ما مدونتك اتلغت أو وقعت مش عارف ايه اللى حصلها
عموما
welcome back

huda يقول...

حادث القطار الثاني ودم الاولاني ملحقش ينشف ، الي اين يأخذنا هذا النظام ، الي اي محرقة ، ما يحدث الان يذكرنا بزمن الثورة الفرنسية موت بالميات وكله تحت المقصلة ، بس احنا بنتعاقب علي ايه ، مبقاش فاضل غير اننا نتحاسب علي انفاسنا وخصوصا لو اخذناها في اماكن غير مصرح لنا الاقتراب منها، هون ليه علي بعض ، المصري هان علي المصري ليه ، من لمصر ، هنجري نستخبى في جلبية مين

محمد الطاهر يقول...

هدى
كل يوم حادثه زى مايكون النظام بيعودنا على الكوارث

محمد توفيق يقول...

انا بشكرك على مجهودك الرائع
وعلى كلامك الجامد
ونتقابل فى طرة او ابو زعبل لو حلفنا الحظ

محمد الجرايحى يقول...

أخى الكريم
محمد طاهر
السلام عليكم ورحمة الله وبركاته
أحييك على موضوعاتك القيمة
والتى يظهر من خلال سطورها وكلماتها غيرتك الطيبة على وطنك
وصدق مشاعرك
بارك الله فيك وأعزك
أخوك
محمد الجرايحى

thecaller يقول...

السلام عليكم..
ربنا يكرمك يا محمد..اصيل و الله..
خلاص انا رجعت تانى اهه..
مقالك تقيل و مليان و مجهودك رائع..
موضوع الشاعر ده عجيب..حسبنا الله و نعم الوكيل..
مع ان التخريف ده عمره ما طلع من ولاده نفسهم..عمر الله يرحمه كان ولد زى
الفل..و محمد كمان كويس

يا بخت من كان سعادة الباشا خاله بقى..
انا كتبت النهارده عن مسخرة قضية بنى مزار..متفرقش كتير عن دى..صح؟

بحب مصر يقول...

ماشفتكش من زمان ياباشا و عايز اشوفك يوم الاربعاء اللى جى فى دار الحكمة فى الحفلة اللى عملاها نقابة الصيادلة علشان فلسطين و لبنان

ده نص الاعلان :

دعوة

نقابة صيادلة مصر تدعوكم لحضورالحفل الفنى الخيرى لعم المقاومة " ليلة مع المقاومة " احتفالا بانتصار المقاومة فى لبنان و دعما للمقاومة فى فلسطين , و ذلك بدار الحكمة يوم الاربعاء الموافق 13/9 قى تمام الساعة 7,30 م , و يشارك فى الحفل الفنان مصطفى محمود و فريق الوعد , و يتخلل الحفل جمع تبرعات بمشاركة لجنة الاغاثة بنقابة الاطباء , الى جانب عقد مزاد خيرى لدعم المقاومة


الحفلة مش معمولها دعايةكويس , حاول تيجى و تجيب شباب الحزب معاك

ياريت اشوفك يومها

Abed. Hamdan يقول...

رجال ياأهل مصر..والله رجال..

الله يحميكم ياأخواني

محمد الطاهر يقول...

محمد توفيق
ربنا يستر

محمد الجرايحى
شكرا جدا

thecaller
انتى غيرتى اسم المدونه ليه؟؟
احنا اتعودنا على الإسم القديم

بحب مصر
اذيك خالد عامل ايه
والله مش عارف هقدر اجى ولا لا
قول يا رب

Abed. Hamdan
شكرا على التعليق

entrümpelung wien يقول...

شكرا على الموضوع
entrümpelung
entrümpelung
entrümpelung wien