أيها الرئيس سحقا لك...أنا عايز آكل

مشهد حوار بين مواطن وطبيب المواطن: لو سمحت يا دكتور عايز اتبرع بالكليه بتاعتى للمستشفى أعمل إيه؟؟ الطبيب : مافيش حاجه إسمها تتبرع بكليتك للمستشفى إنما لما يكون فيه حد محتاجها وكليتك متوافقه معاه ممكن تتبرع بيها ليه المواطن : بصراحه كده أنا عايز أبيعها يتلعثم الطبيب من هول ما سمع فكيف بشخص يقرر أن يقطع جزء من جسده ويعرضه للبيع يرده عليه الطبيب : لكن المستشفى ملهاش دعوه بالحكايه دى المواطن :طيب ماتعرفش حد عايز واحده؟؟ الطبيب وقد إستشاط غضبا وشفقه فى نفس الوقت : لا المواطن : طب ماتعرفلهاش أى تصريفه؟؟ إلى هنا ينتهى المشهد على فكره الكلام اللى انا قلته دا مش مجرد خيال ، إنما دا حصل فعلا ومش مع طبيب واحد ولا فى مستشفى واحده ولا مواطن واحد إنما كتير وكتير جدا كمان ، صدقونى دا حصل فعلا مش علشان أنا مش طايق ميتين أم النظام وحسنى يبقى هفترى عليهم وأقول إنهم بعد ما بيعوا الشعب هدومه هيبيعه نفسه ، أصل أكيد اللى رايح يبيع كليته دا أكيد قبل كده باع هدومه مش هدومه وبس إنما كل حاجه ممكن تتباع، أكيد المواطن دا لو معاه إنه ياكل مش هيفكر يبيع أعضاءه ،لو معاه فلوس ياكل بيها ،ياكل وبس من غير سكن ماكنش يفكر يبيع حته من جسمه،عايزين ناكل بس مش أكتر من كده بدل مانبيع نفسنا الله يخرب بيتكم يا ولاد الكلب ، كل الأمراض اللى إنتشرت دى ،الكبد وأمراض الكلى والسرطنات كلها بسبب اللى مايتسمى يوسف زفت. على فكره فيه حوادث تانيه كتير من النوعيه دى مثلا عندنا فى مصر عمليات الكلى بتبقى على نفقة الدوله وبما إن الناس مش لاقيه تاكل فبعد مايعملوا العمليه وينقلوا الكليه يقوموا يبيعوا الدواء اللى الدوله بتصرفه ليهم فجسم المريض يطرد الكليه الجديده والكليه تبوز تانى ويرجع يعمل غسيل كلوى كل اسبوع 3مرات ،المريض اللى يبيع الدواء بتاعه يبقى أكيد مش لاقى ياكل ،وبرده حكاية بيع الدواء دى منتشره بطريقه غير طبيبيعه والله إنتشارها يخلى الواحد يترعب لما يسمع الحكايات دى. طبعا دا غير حالات بيع الكليه اللى منتشره جدا جدا ،لدرجة إن الأجانب بتيجى من بره مصر علشان تعمل عمليات النقل هنا لان بسهوله ممكن يلاقوا كليه وبسعر رخيص وبالضمان كمان ،ودى حقيقه معروفه لكل الأطباء . مش عارف أقول إيه غير الله يخرب بيت اليوم اللى شوفنا فيه حسنى مبارك ووبقيت العصابه اللى معاه ، دا مش نظام حاكم دى عصابه ، عصابة حرميه ، يا ريس الله يخرب بيت العيشه ، عايزين ناكل ، مش عايزين حريه ولا ديمقراطيهولا زفت ولا أى حاجه، عايزين ناكل ، خلاص إحنا بعنا هدومنا وبعنا أعضاءنا وبعنا ولادنا مش لاقيين حاجه تانيه نبعها، يا ريس عايزين ناكل ، مش عايزين أى حاجه غير إننا ناكل عاااااااااااااااااااااااااااااااااااااااااااااايز آآآآآآآآآآآآآآآآآآآآآآآآآآآآآآآآآآآآآآآآآآآكل