الاثنين، سبتمبر ١١، ٢٠٠٦

العدد الجديد- صور القبض على أعضاء حزب الغد

المحتويات
المقالات
-التوريث الآن
-تعريف الإقتصاد الإسلامى

التغطيات
صور القبض على أربعه من أعضاء حزب الغد يوم الجمعه الماضى فى ذكرى مرور عام على حكم الطاغيه مبارك-



التوريث الآن

كل واحد فى الدنيا دى عايز يكون هو أحسن واحد ، إلا الأب دايما بيكون عايز إبنه أحسن منه ،وهى دى مشكلتنا دلوقتى إن الريس مبارك عايز يكون ابنه أحسن منه ، والواد صدق نفسه إنه بقى بنى آدم وكبرت فى دماغه وعايز يبقى أحسن من أبوه فعلا ، وطب وهيبقى أحسن من أبوة ازاى وأبوه وصل لأعلى منصب اللى هو رئيس الجمهوريه ، يبقى الحل إنه لازم يبقى رئيس جمهوريه زى أبوة ويبقى كمان رجل أعمل كبير أوى أوى ،المصيبه إن إحنا كمان شكلنا كده مش هنحرم الراجل وإبنه من حاجه وهنحقق أمنيتهم .
دا غير إن الأحداث الأخيره كلها بتقول إنخلاص التوريث قادم يعنى قادم وجمال مبارك قادم يعنى قادم ، حتى إن حسام البدراوى قال إنه كحزب حاكم يتطلع للمحافظه على كرسى الحكم ، وقال إن جمال مبارك احد الشخصيات اللى ممكن تكون مرشحه لرئاسة الجمهوريه عن الحزب الوطنى ، يعنى من الآخر جمال جاى جاى ياولاد اللذين ومافيش حد هيعرف يوقفه لا كفايه ولا أحزاب ولا إخوان ولا أى حد .
المؤتمر السنوى بتاع الحزب الوطنى خلاص كمان كام يوم ، يعنى هتبقى فرصه تمام لما مبارك يتنحى ويمهد لإبنه إنه يمسك البلد ، والأيام دى الظروف تمام ، الناس بتجرى ورا أكل عيشها بعد الغلاء الفظيع ، والحوادث والكوارث بيذيدوا والقطارات عماله تخبط فى بعض والناسمش لاقيه تاكل وبرده ساكته والحكومه وصلت لمرداها والناس إتعودت على الكوارث دى ومابقيتش بتعلق والحكايه جايه ليك يا جمال على الطبطاب .
دا غير حملة الإعتقالات الأخيره فى صفوف الإخوان المسلمين تفتكروا ليه ؟؟ قوة الإخوان ماحدش يقدر ينكرها علشان كده مش بعيد إن يكون دا تمهيد للمرحله الجايه يعنى( هيقصقصوا ريش )القوى الوطنيه ، دا غير الغلاء اللى إحنا فيه ، أنا قريت فى أكتر من مكان إن من الممكن إن الغلاء دا يكون مقصود به إلهاء الشعب عن الأحداث القادمه ، والله يعنى هو مش بعيد يكون كده فعلا.
دا غير التعديل الوزارى الأخير يعنى لما يبقى ممدوح مرعى هو وزير العدل يبقى أكيد فيه مصيبه جايه ، أصل ممدوح مرعى دا كان رئيس لجنة إنتخابات رئيس الجمهوريه ومنصب الوزير دا جاله مكافئه على اللى عمله مثلا رفض إشراف المجتمع المدنى ورفض الطعون اللى إتقدمت فى إنتخابات رئاسة الجمهوريه وأشهرها الطعن اللى قدمه الدكتور أيمن نور.
كمان الإبقاء على البلطجى الأكبر حبيب العدلى رغم المصايب اللى عمله تنزل علينا وفشله الزريع فى حماية الأمن الداخلى والعمليات الإرهابيه بتذيد ومحادش عارف يعملهم حاجه إلا انه ورغم دا كله لازل وزير .
هو إيه اللى بيحصل لنا دا ؟؟ هو إحنا بنى آدمين؟؟ طب إحنا زى بقيت الناس ولا أقل ؟؟ ولا إحنا مش ناس أساسا ؟؟
حسبنا الله ونعم الوكيل
فى الآخر أرجع وأقول يا عم دى بلدهم وحرين فيها

----------------------------
تعريف الإقتصاد الإسلامى

يستند الإقتصاد الإسلامى فى الأساس على على مبدا الرأسماليه ، فهو يعتمد على حرية السوق والعائد على الفرد ، لكنه ترك من الرأسماليه الكثير حيث حرم الإسلام الاحتقار والربا كما أمر بالعداله الإجتماعيه.
ايضا نظر الإسلام إلى مشكلة الطبقيه حيث فئه قليله تمتلك وفئه كثيره لا تمتلك ، قال الله تعالى :0(والذين يكنزون الذهب و الفضة و لا ينفقونها في سبيل الله فبشرهم بعذاب أليم ) من هنا يظهر أن الإسلام سعى إلى تقليل الفجوه بين من يملك ومن لا يملك ، ليظهر المجتمع على هيئة طبقات صغيره وآخرى متوسطه . أيضا نظر الإسلام إلى الثروة الضخمه ونظر إلى كيفية تفتيتها وتوزيعها ويظهر ذلك فى الإرث حيث لا يستطيع صاحب رأس المال أن يتصرف فى وصيته بأكثر من ثلث رأسماله بالتالى تنتقل الثروة تلقائيا إلى أكثر من فرد كما أن الزكاه أيضا تساهم فى تفتيت الثروة وتقليل الفجوه بين طبقات المجتمع .
كما ان الإسلام إهتم بتحديد صلاحيات رأس المال فمثلا منع الربا لان الربا يثرى رأسمال دون أى تعب على حساب الطرف الآخر ولو لم يحرم الربا لإتسعت الفجوه بين طبقات المجتمع ، أيضا منع الإحتكار مما سيذيد فرصة المنافسه والمزاحمه وكلها تصب فى مصلحة المستهلك كما ان الإحتكار يمنع التقدم والتطور فرأس المال هدفه المصلحه الشخصيه فقط فلماذا يطور من منتجه مع انه لا يوجد منافسا له؟
كما نظر الإسلام أيضا إلى حقوق العامل فالنبى صلى الله عليه وسلم أمر بإعطاء الأجير أجره قبل أن يجف عرقه ، وإعتبر الإسلام أن إنتقاص جزء من أجر العامل يعتبر ظلم واقع عليه ، وأمر أن يكون الأجر مكافىء لمجهود العمل.
ونستطيع أن نقول أن الإقتصاد الإسلامى ينظر إلى العمل على أنه مساوى لرأس المال حيث قلل من سلطات رأس المال و دعى إلى العداله الجتماعيه.


-----------------------
ذكرى مرور عام على حكم الطاغيه مبارك

ذكرى مرور سنه على حكم الطاغيه مبارك كان يوم الجمعه الماضى ، حزب الغد قرر مشاركة القوى الوطنيه بهذه المناسبه السيئه وأقام مؤتمر عام دعا له كل القوى الوطنيه ، كما أحتفل أعضاء الغد بحصول الدكتور ايمن نور على لقب الوصيف وحصوله علىا لمركز الثانى رغم ماحدث من إنتهاكات.
أثناء وضع اللمسات الأخير من أعضاء حزب الغد فى تحضير مؤتمرهم ، صعد أحد الضباط إلى الحزب وقال أن المرور سيأخذ السياره التى تحمل المولد والسويدوس وهى بعض الادوات التى سيقام المؤتمر بها.
عند نزول أعضاء الحزب إلى الشارع واجدوا أن المراد فى أساسا هو إسقاط اليوم كاملا حيث ان السياره التى يريد الأمن أخذها هى السياره التى تحمل المولد واجهزة الصوت وبدونها لن يتم أى شيىء.
شكرا للزميل أحمد علاء على مساعدته فى التصوير


هذه الصوره عندما بدأ أعضاء حزب الغد النزول

بدأنت المفاوضات حول مكان السياره هل مسموح بوضعها هنا أم لا

أعضاء الغد قرروا عدم السماح للأمن بأخذ السياره

فجأه إنشقت الأرض عن خمس عربات أمن مركزى وحربة ترحيلات كل هذا من أجل سياره تحمل مولد كهربى و اجهزة صوت

أحد أعضاء حزب الغد عندما وجد أن الأمن سيأخذ العربه بالقوة نام تحتها ومنعهم بالفعل من تحريك السياره

العربيات دى كلها محمله عساكر علشان عربيه نقل مركونه فى الشارع

الأمن عمل كردون بسرعه رهيبه حول العربيه وداخل الكردون بعض أعضاء الغد وخارجه أيضا

الأمن كل شويه يذيد

تم الإتفاق أخير على أن تتحرك السياره وتتركن فى أحد الشوراع الجانبيه

أعضاء حزب الغد إكتشفوا إن الأمن بيخدعهم وعايز ياخد العربيه ويتحرك وإن مافيش اى مكان فى اى شارع جانبى زى ما كانوا متفقين مع اللواء علشان كده الشباب وقف قدام العربيه ومشى أمامها علشان يضمن إنها تتركن فى المكان اللى إتفقوا عليه ومايخدوهاش ويمشوا

بدأ العنف بقى لما الأمن لقى الشباب وقفين قدام العربيه وبيتحركوا أمامها علشان مايخدهاش ويمشوا
خدوا بالكوا من الراجل الأقرع دا علشان دا إبن ستين عمل بلاوى بعد كده وهتشوفوا فى الصور

الصوره دى أحد الشباب قعد فى وسط الشارع علشان يمنع الأمن أنهم يوقعوا اليوم اللى تعب فيه أعضاء حزب الغد وأحد الظباط جه وقعد يسب ويلعن ويقول للعساكر شيلوه وأرموه فى العربيه

المؤتمر هيكمل يعنى هيكمل

جمسله إسماعيل حضرت بسرعه وقعدت مده تتفاوض مع اللواءات - صحيح كان فيه أربع لوئات

إظاهر إن مشكلة العربيه دى كبرت أوى

هنا بقى أنا كنت هضيع دا الراجل أبو قرعه اللى كنت بقولكم عليه وهو هنا بيشدنى علشان العربيه تتحرك

أبو قرعه قرر ياخدنى معاه ودى أول مره أمن يشدنى من مظاهره بس الحمدلله جيمى هوود ويوسف محمد شدونى بعيد عنه بصعوبه وبعد

لسه بيحاول ياخدنى بس الحمد لله إنى كنت وسط الناس بتوعنا ومش لوحدى زى اللى إتخدوا بعد كده

لسه بيحولوا يحركوا العربيه


فيه كمان عربيتين فى الجنب التانى

هنا بقى بدأ الأمن ياخد الناس ... شايفين أبو قرعه؟؟

هنا الأمن وهو بيعتقل إبراهيم


خدوا حازم المليجى ومشيوا بيه بسرعه جدا بعيد عن الناس


بيحولوا يبعدوا إبراهيم عن الناس علشان يخدوه بسرعه

هنا وهما بياخدوا عصام الشريف

خلاص كده جبرت وقبضوا على أربعه من حزب الغد هما:
- حازم المليجى حزب الغد - شباب من أجل التغيير
- عصام الشريف حزب الغد
- إبراهيم حزب الغد
-خالد حزب الغد

والحمد لله خدوا العربيه برده

لم نفسك بقى بسرعه وإمشى

ماحقوش يمشوا أصل حزب الغد جه من بورسعيد بمظاهره هو كمان و انشقت الأرض عن حوالى 30 عضو من بورسعيد جاء للمشاركه فى المؤتمر


لم نفسك تانى


دى عربية الترحيلات اللى كان فيها الأربع شباب



رغم كل ماحدث إلا أن المؤتمر كان ناجحا لأبعد الحدود من حيث عدد حضور الشباب أو القيادات أو الرموز الوطنيه
ودى شوية صور من المؤتمر





هناك ٢١ تعليقًا:

غير معرف يقول...

بس انا مش فاضى اقرا كلة ابقى نزل المواضيع واحدة واحدة حرد على موضوع حزب الغد اكمنى عضو فية بس انا كنت فاقد الامل فالحزب دلوقتى نفسى مفتوحة للشغل ومقتنع اننا اقوى حزب حتى اقوى من الوطنى وشوية كدة وحنسبق الاخوان رغم الى بقولة دة يمكن يكون مستحيل لان الاخوان منظمين جدا واقوية جدا انا لو مكانهم كان زمانى بحكم مصر

غير معرف يقول...

مصر هية امى مبارك جوة دمى جمال هوة املى

Khaled gad يقول...

كنت هتضيع يا طاهر , بس الحمد لله ربنا ستر
كل يوم بيتأكدلى انحزب الغد قوى , و الله بفكر انظم ليكم
عموما ياريت اشوفكبكرة فى الحفلة الخيرية فىدار الحكمة الساعة 7,30

Mo Eltaher يقول...

شكلى كده فعلا هاجى
عموما ابقى اتصل بيا بكره

Mo Eltaher يقول...

سوووم
كويس ان نفسك اتفتحت تشتغل للحزب بتاعك شيىء كويس

محمد
مبارك جوه دمك؟؟ سوررى بس فى امل انك تتصاب باللوكميا

غير معرف يقول...

جميل يا طاهر المرة دي انا وبلال منعناهم انهم ياخدوك عاوزك تتابع المدونه عندي علشان في صور جامده حا تنزل اخوك باسم حسين

http://freebassem.blogspot.com

غير معرف يقول...

ايه يا عم الصور الجامدة اوى دى انا لما شفتها حسيت انى كنت عايشه فى دنيا تافهه مش عارفه اللى حاصل فى البلد وصل لفين انا اسفه اوى عالغيبوبه اللى احنا كنا فيها

غير معرف يقول...

انا عضوه في حزب الغد وبقولهم مش ممكن تفوز علينا لان كل ظالم وله نهايه

غير معرف يقول...

السلام عليكم..
يا محمد و الله مش عارفه اقول ايه..
ربنا يحميك انت و اللى زيك..شغلك ما شاء الله مش معقول..الصور وجعتلى قلبى و كان نفسى اضرب الراجل العجيب ده..
ربنا ع الظالم و المفترى..ثم احنا ان شاء الله
ah sa7ee7..ana lesa thecaller...bas eh ra2yak...mesh e-nadaha esm original khales:S

غير معرف يقول...

بص يا حماده مادام إنته حزب شعري ولسه ما إتحلتشي ولسه ماتميش حظرك يبقي إعرف إنك ولا تساوي شيئ
إجدعن كده وخلي الحزب بتاعكم يتحظر ويتحل والحاجات ديه
ميت
الإخوان المسلمين المحظوره
Mait
The Muslim Brotherhood Banned group

غير معرف يقول...

يعنى هوه لازم يا عادى يكون محظور علشان يبقى تمام

ماهو حلو اهو و شغال و ميه ميه

Mo Eltaher يقول...

Anonymous said...
مدام الحكايه كده يبقى تعالى معانا بقى فى شباب من اجل التغيير

Anonymous said...
وانا معاكى

thecaller
شكرا جدا يا كالر
والله مش عارف اذا كان الإسم حلو ولا لا لانى ببساطه مش فاهم معناه بس أنا كان عاجبنى الإسم الأولانى اوى مش عارف ليه بس يمكن علشان اتوعودت عليه
عموما خير وربنا يوفقك
وبجد والله بوستاتك جميله جدا

Mo Eltaher يقول...

ميت

انا طبعا مش عارف ايه علاقة ردك دا باليله
البوست بيتكلم عن التوريث والاقتصاد الإسلامى وصور الناس اللى اتقبض عليها
مابيقولكش اذا كان الإخوان الأقوى ولا الغد

وبعدين ايه علاقة ان الغد لسه ما تمش ايقافه بانه بيأثر ولا لا؟؟
بص يا محمد لو هنتكلم عن كده انا ممكن

إقرأ البوست تانى وانت تعرف انا بتكلم عن ايه لان انت كده خرجت عن الموضوع وجاى تتكلم عن الإخوان وخلاص

جيمى
مش عارف والله قوله ياعم دا إن الإخوان اللى بيتكلم عليهم ممكن النظام يكتهم بحزب قوله ليه مابنشوفش جنس إجوانجى غيره فى مظاهرات كفايه

غير معرف يقول...

اية يا عم ميت الغد محظور فعلن والحكومة بتكرهة تصدق بيبهدلوتا اكتر منكم

غير معرف يقول...

E-nadaha..
النداهه!!
يعنى ذا كول بس بلدى!!
بصراحه تغيير الاسم كان للتمويه نظرا لظروف معينه..
شكرا يا محمد..

الاخ ميت:
انا مش قادره افهم تعليقك..هو فيه غيظ كده و حقد دفين:):)
بص يا ميت..الموضوع مش موضوع حزب اقوى من حزب و لا اقوى ليه..
الموضوع ايمان بحقوق الناس و العمل لده بغض النظر عن اطماع سلطويه..
و الدين كده كده مش مختلفين على انه اساس بدليل ان محمد باين عليه محترم و متدين..
يبقى ايه بقى؟؟
يبقى المهم الهدف يتحقق بالنيه السليمه عشان الشعب يستفيد من التغيير لما ييجى و ما يتكررش الفساد تانى..
و شكرا:)

غير معرف يقول...

أحبكم جدا وأحييكم ومشفق عليكم وكمقاتل مصري من رجال أكتوبر ، أقول لابد من تنظيم الصفوف وتذكروا قول الزعيم الذي شوهوا لكم صورته وهو بحق إبن مصر البار
( أن ما أخذ بالقوة لايسترد بغير القوة)
وما أخذ هو شرفكم وشرف مصر

غير معرف يقول...

الشعب المصرى كله بيحب الحياة , عشان كده هايعيش أكتر من جلاديه

مصطفى محمود يقول...

ربنا معاك يا رفيق طاهر ..لازم كلنا نكون ايد واحدة....ولازم كل الشباب تعرف ازاى تتعامل مع الامن ...دة شىء ضرورى جدا

ويجعلة عامر

Mo Eltaher يقول...

سووم
الغد مش محظور
-----------
thecaller
تصدقى اول مره اعرف ان زا كلر يعنى النداهه؟؟
اصل انا مش ولابد فى الانجليزى
كلمك كويس جدا بس فيه حاجه إن الغد بينادى بالليبراليه فى الإقتصاد وبس
وممكن تشوفى اللينك دا وانتى تفهمى انا اقصد ايه


استحملوا ميت أصلخ أخوان وانا لما اشوفه بكره هبلغ عنه
أصله فاكر إن الإخوان هما بس اللى فمصر
------------
Anonymous said
شكرا جدا جدا على التعليق

---------------
محمد زهران
فعلا بيحب الحياه جدا ويقدر يعيش فى اى ظرف
------------------------
hitler1939
شكرا على التعليق

عمر يقول...

كل سنه وانتم طيبين وربنا يعود علينا وعليكم الايام بخير

غير معرف يقول...

مش فاهم قصدك يا طاهر انا لما قلت الغد محظور كانت صيغة مبالغة على ان الحكومة بتعاملنا زى الاخوان رغم اننا شرعيين ودة بالنسبة لكفاية