الجمعة، يناير 06، 2006

مطلوب وزراء للعمل شرط أن يكون من جيران د\نظيف؟

طالعتنا الصحف المصريه المعارضه-حلوه حكاية طالعتنا دى اوى-المهم انها طالعتنا على الحقيقه البائسه والتى بالفعل تثبت صحة مقولة مافيش فايده بتاعة طلعت باشا حرب.
المصيبه يا اخوانى ان الدكتور احمد نظيف رئيس الوزراء إختار وزرائه ليس عن طريق الافضليه فى الكفاءه ولكن على طريقة اللى تعرفه احسن من اللى متعرفوش مثلا وزير الصحه كان طبيب لزوجته ووزير التعليم يبقى جاره -وطبعا ده يدل على تدين الباشا لان النبى وصى على سابع جار بس الباشا خد جار واحد بس والباقى فى الوزارات الجايه-ووزير التعليم العالى من أصحاب الدراسه طبعا إنا ما عنديش اعتراض-بما انى من الشعب- على الإحتيارات العظيمه دى لكن حبيت اعرفكم إيه هى شروط الوزير المفروض يكون له معرفه سابقه بالدكتور نظيف وحبذا لو جيران بعد كده ييجى المؤهل -حبذا لو كان عالى-وبعدين تيجى الكفائه وربنا يستر على البلد.
بس الغريب انى انا دلوقتى حاسس إنى هكون وزير و ده لانى انا جار الدكتور نظيف فهو يسكن فى 6 اكتوبر وانا ايضا بس المشكله على ما ييجى عليا الدور فى الوزاره هيكون فى عهد شادى جمال مبارك لان انا ساكن بعيييييييييد عن الدكتور نظيف

ليست هناك تعليقات: